كلنا
بنحتاس لما نفكر نشترى موبايل جديد، بعيدا عن خناقة أندرويد ولا آيفون،
بتطلعلنا خناقة نجيب أنهى موديل، سامسونج ولا سونى؟ آيفون 4 ولا 5؟
قررنا نحاول ننور لكم حته فى الخناقة دى ونزودكم بشرح مبسط لأهم مواصفات specs السمارت فونز، وازاى تفهمها كويس علشان تاخد قرار سليم.
الأجزاء الأساسية اللى هـ نستعرضها هى البروسيسور Processor، والميمورى وسعة التخزين Memory and storage، والشاشة Display، والكاميرا، وطبعا البطارية
١. البروسيسور Processor
زى
ما علمونا فى المدارس … البروسيسور هو المخ وكل ما مخك كان أكبر يبقى
أحسن وأسرع، لكن ده كان زمان، دلوقتى ما بقاش الرقم هو المحدد الوحيد.
ارمى بقى جو التقنيات ده ورا ضهرك، وروح على طول على البينشماركس أو مقارنات السرعة والكفاءة.
ودى
سكورات وتقييمات بتعملها شركات متخصصة فى إنها تختبر السرعة، ولحسن الحظ
فيه كتير منهم بينشروا النتايج دى بشكل مجانى، نرشح لكم منهم Geekbench و PassMark.
٢. الميمورى والرامات Memory and Storage
أى
جيمر عتيق عارف طبعا إن الرك على الرامة، وإن حجم الرامات بيفرق بشكل واضح
فى سرعة اللعبة عالكمبيوتر لأن هى دى الذاكرة اللى بيتحفظ فيها الداتا
بتاعة اللعبة. الفرق مش كبير على الموبايلات، الرامات الأكتر أحسن نظريا،
بس زى البروسيسور مش ده اللى بيحدد الأداء الأعلى. يعنى مش شرط إطلاقا إن
الجالاكسى إس 4 اللى فيه 2 جيجا رام، يكون أحسن أو أسرع من الآيفون 5 إس
مثلا اللى 1 جيجا رام بس.
ليه
بقى؟ لأن فى الأساس الموضوع معتمد على البروجرامرز عاملين برامجهم إزاى،
وفى الأندرويد بالذات لأن الفروق كبيرة بين الأجهزة، وبيحاولوا يعملوا
البرامج على أقل رامات ممكنة علشان تشتغل على أى جهاز. البرامج متظبطة فى
الأيفون على راماتها. فـ بإختصار لو هـ تجيب أندرويد قارن بين الرامات، لكن
ما ينفعش تقارن بين موبايل أندرويد وأيفون عن طريق مين راماته أعلى.
٣. الشاشة Display
الجزء اللى
بيفرق فى القصة كلها الشاشة. هى أكتر حاجة بتستخدمها فى الموبايل وعينك
لازقة فيها طول اليوم وبتأثر جدا على انبساطك به. الشاشة بتتقيم بكام حاجة
مهمة أوى:
أول حاجة الدقة أو الريزوليوشن Resolution. بس خلى بالك إن فيها خدعة.
شاشة كبيرة بدقة عالية ممكن تكون أقل جودة من شاشة صغيرة بدقة أقل.
لأن الرقم العالى مش هو المهم، المهم هو فيه كام بيكسل فى البوصة PPI. وده ما بيبقاش مكتوب، وتقدر تحسبه بنفسك من هنا.
وتانى حاجة تكنولوجيا العرض، والأشهر اللى انت تعرفهم هم : IPS-LCD, OLED, Super LCD
IPS-LCD
دى
الطريقة التقليدية لتصنيع الشاشات. الموبايلات اللى بتستخدم التقنية دى
بتدى ألوان جميلة، لكن بتبقى الرؤية سيئة فى النور الطبيعى outdoors. آيفون5 إس هو مثال على موبايل شهير بيستخدم التقنية دى فى شاشاته.
OLED
سامسونج بتسميه AMOLED ، وده يختلف عن الـ IPS-LCD فى إنه بيستخدم مركبات عضوية مشعة للضوء بدل الإضاءة الخلفية علشان يحل مشكلة الرؤية فى الـoutdoors.
التكنولوجيا دى ميزتها إنها بتسمح بانتاج شاشات رفيعة، وكفاءتها عالية
تقدر تديلك كونتراست عالى وممتاز. ودى التقنية الأكثر انتشارا فى أغلب
الموبايلات اللى بتعتبر فى أعلى فئة. سامسونج طبعا المستخدم الأبرز للتقنية
دى.
Super LCD
تقنية شبيهة للـ IPS-LCD لكن بمسافة أقل بين الإزاز الخارجى والشاشة. يعنى بتسمح بشاشة ذات سمك أقل، وشكل أفضل. نفس جمال ألوان الـ IPS-LCD، لكن أفضل منه بكتير فى موضوع القراية فى الـ outdoors.
HTC هى أكتر صانع موبايلات مخلص للتقنية دى. مفيش تقنية أفضل، الموضوع حسب الذوق الشخصى. شوف موبايلات مختلفة وقرر التقنية اللى انت حاببها. OLED هى الأكثر انتشارا، لكن Super LCD أفضل فى نقطة القراية outdoors، وأوضح فى الإضاءة الطبيعية.
بس خلى بالك، كل ما الريزوليوشن زاد وسطوع الشاشة زاد، كل ما عمر البطارية قل.
٤. الكاميرا
بالنسبة لناس كتيرة الكاميرا بتبقى أهم حاجة في الإختيار علشان بتفرق معاهم الكواليتى بتاعت الصور و السيلفى.
طبعا
أول حاجة فى الكواليتى هى الميجا بيكسل. كل ما الميجا بيكسل بتاع الكاميرا
كان عالى كل ما كانت جودتها أعلى. شوف كمان الإمكانيات المتاحة فى
الكاميرا، هل فيه image stabilization؟ هل فيها slow motion؟
دى أوبشنز مهمة وبتديك مؤشر على جودة الكاميرا لأن الإمكانيات دى مرتبطة
بالهارد وير بتاعها. ده غير إنها بتسمح لك بإلتقاط صور أفضل.
وطبعا
بقى المقارنات بين الكاميرات لأن فيه فروق تقنية ما حبتش أدخل فيها زى
السنسور بتاع الكاميرا و حجمه. فأحسن حاجة علشان تختار انك تشوف المقارنات
عالنت بقى، فيه موقع ممتاز على النت تقدر تستخدمه فى المقارنة بين الصور ،
دوس هنا علشان تجربه.
٥. البطارية
موضوع
البطارية معقد أوى، مفيهوش نقط تقنية واضحة ممكن تحدد بيها كفاءة
البطارية غير يمكن حاجة وحيدة وما هياش محدد مهم أوى وهى الـ mAh اللى هو سعة البطارية. يعنى 1500mAh معناها إن البطارية دى تقدر تشغل الجهاز ده بـ100milliamp
لمدة 15 ساعة. المفترض إن الرقم الأكبر أفضل، بس الفكرة إن مش كل
الموبايلات بتستهلك نفس قدر الطاقة. فممكن موبايل يكون بطاريته الـ mAh
أعلى من موبايل تانى، لكن استهلاكه للطاقة أعلى وبالتالى بيهلك البطارية
أسرع. فهو مؤشر بس مؤشر تعبان، مفيش حل لموضوع تقييم البطارية غير الـ benchmarks. وأرشحلكم عامة فى المسألة دى GSM Arena بيحط بينش مارك زى ده فى تقييمه لكل موبايل.
أكتر شركة بتركز فى موضوع عمر البطارية دى هواوى Huawei ، الهواوى ميت ٨ Huawei Mate 8 الجديد مثلا كاتبين على GSM Arena انه بيعيش ١٠٣ ساعة، فى حين إن الأيفون ٦ إس مثلا بيقعد ٦٢ ساعة بس، متخيل الفرق؟
دى الحاجات الرئيسية اللى لازم تبص عليها وانت بتشترى موبايل، قولنا صحيح …
بتحب الأندرويد ولا الأيفون؟
بتحب الأندرويد ولا الأيفون؟
