ليه
الترامادول بقى مخدرات مع إنه دوا عادى وفيه مرضى بتحتاجه؟ الترامادول مش
هو الدواء الوحيد اللى ساءت سمعته فأصبح يصنف كمخدر ممنوع تداوله. إليكم
ليستة طويلة من أدوية أصبحت ممنوعات!
١- الأفيون
من
أقدم المخدرات على الاطلاق. انتشر استخدامه فى القرن الـ 19 فى أمريكا. كان
الدكاترة بـ تكتبه للمرضى عادى، وبـ يتباع فى محلات البقالة كمان!
وفى
الصين كانوا عاملين منه تركيبة مع كحول للستات علشان آلام الدورة الشهرية،
وللأطفال اللى بـ يسننوا. واستمر لفترة طويلة للقرن العشرين لحد ما
اكتشفوا إن ستات كتير أصبحوا مدمنين للافيون، ومن هنا بدأ منعه. بعد كده
اتعمل من الافيون مشتقات كتير أهمها المورفين، والكوديين. الأفيون لسه
موجود لحد دلوقتى فى مصر، بس بقى موضة قديمة.
٢- الميثامفيتامين
عالم
يابانى حول الامفيتامين (المعروف بحقن الماكس)، لمادة جديدة اسمها
ميثامفيتامين أقوى منها بكتير. وفى 1944 أخدت تصريح بنزولها السوق عادى
لعلاج أمراض زى الإكتئاب والخدار (مرض بسبب نوم مستمر ليل ونهار)، والتخمة
والحساسية الموسمية. بصراحة هو اختراع! يعنى دوا بتاخده بـ يخليك فايق،
ونشيط جدا، وبـ تشتغل وانت مركز، وما بتاكلش كتير، ووزنك بـ يقل بـ تبقى
نحيف! (skinny). وطبعا الناس قعدت تسف فيه بسبب ومن غير سبب, فبعد 30 سنة
اتمنع وتم تصنيفه ضمن المخدرات.
حاليا
بتوع الجيم والمصارعة برا مصر بـ يجيبوه. ومشهور تحت اسم ادريال،
وبيستخدموه لأنه بـ ينحت الجسم على العضلات الموجوده. مش موجود فى مصر ومش
ناس كتير تعرفه. لكن فى أدوية برد عادية من اللى بـ تتباع من غير روشتة
ممكن يطلع فيها المادة دى، فبقت برا بـ تتصرف من الصيدلية بالبطاقة
الشخصية، إنما فى مصر بـ تتباع عادى.
٣- بيوت الصبار
نبات
اسمه البيوت بيطلع مادة مهلوسة اسمها مسكالين. كانت معروفة زمان فى
الحفلات الدينية فى أمريكا. وكان مصرح بيها لحد الستينات، بعدها اتمنعت،
وبقت جناية إنه أى حد يتمسك بيها. وتقريبا اختفت دلوقتى.
٤- LSD
أقراص
الأسيد زى ما بيتقال عليه، هو أشهر مادة مهلوسة فى العالم لحد دلوقتى.
اكتشافه كان بالصدفة من عالم سويسرى أخد باله إنه مخدر قوى جدا. ده مش من
نبات، ده بيتصنع كله أو زى ما بـ يتقال "مخلق كيمائيا". وبعدها استخدمه
الجيش الأمريكى والمخابرات الأمريكية CIA سنة 1950، فى تجارب. كانوا بـ
يدوه للناس المتهمين بممارسة الدعارة وهم بـ يتحقق معاهم كنوع من غسيل
الدماغ، علشان ما يعرفوش يكدبوا. وكان بيستورد من سويسرا. بعد كده بقت
أمريكا كمان بتصنعه، وبدأ دكاترة نفسيين يستخدموه كمان. وانتشر وقتها،
والناس بقت بتاخده. وقعد عالحال ده 16 سنة، بعدها اكتشفوا إنه ملوش أى
استخدام طبى، وإن كل الناس بتاخده علشان بيعمل هلوسة، واتوقف سنة 1970. بس
برضه لحد دلوقتى موجود وسط المخدرات، وبتعمله شركات تحت السلم لأن تصنيعه
سهل، ومنتشر منه الاستيكرز أو الاستامبات/الطوابع.
٥- المشروم السحرى
فطريات
شبه المشروم اللى بـ يتاكل عادى جدا، بس بـ يطلع منها مادة لها تأثير
هلوسة زى بتأثير الـ LSD بالظبط. كان موجود فى أسيا وأمريكا، واستخدموه
لألاف السنين كأنه أكل عادى. وبدأ الدكاترة النفسيين ياخدوا بالهم من
تأثيره وبقوا يستخدموه بشكل طبى. بس ما لحقوش يا دوب 8 سنين واتحظر
استخدامه وحيازته.
٦- الكوكايين
مستخلص
من نبات الكوكا وكان حاجة عادية جدا لمدة 3000 سنة الناس بتستخدمه عادى
جدا. كانوا بـ يحطوه فى شعرهم لعلاج القشرة. وكان موجود فى الكوكاكولا زمان
أول ما طلعت! وسنة 1860 طوروا استخدامه وكان بيتنقع فى خمرة. وبدأ
الدكاترة كمان يكتبوه للناس اللى عندها اكتئاب أو إدمان للمورفين أو لعلاج
الكحه أو كمسكن عادى.
تخيل يعنى واحد مدمن مورفين يروح للدكتور يكتبله كوكايين! جملة لو قولتها لحد دلوقتى
هـ
يضحك عليك، لكن دى كانت الحقيقة وقتها. وبدأت الاعتراضات على الكوكايين لحد
ما اتمنع نهائيا سنة 1970، بس لسه موجود كمنافس فى سوق المخدرات.
٧- الماريجوانا
هى
ورق نبات الحشيش بس قبل ما حد يعمل فيه أى حاجة. يعنى من غير أى عمليات
تصنيع. وكان أى مزارع بيزرعه فى فالأرض بتاعته. وكان بيتباع عند البقال.
وفضل الكلام ده لحد أوائل القرن العشرين. وبدأ بعدها منعه. وفى الفترة
الأخيرة بدأت تظهر استخدامات طبية للماريجوانا فبدأ يرجع كدواء. ومنظمات
حقوقية فى أمريكا، جمعوا توقيعات ورفعوا قواضى للمطالبة بالتصريح بسجاير
الماريجوانا لأنها أقل ضررا من الكحول المصرح به، ودى حقيقة فعلا. كل مادة
لها درجة إدمان، ويعتبر الماريجوانا، والحشيش، والبانجو أقل إدمانا من
الكحول والسجاير العادية. لذلك الناس دى كسبت القضية ورجعت الماريجوانا!
٨- جى اتش بى GHB
مادة
طبيعية جوا جسم الإنسان اتصنعت فى كمسكن ومهدئ. فى الستينات انتشرت فى
أوروبا فى عمليات الولادة، وبدأ يستخدمها بتوع الجيم تساعدهم للنوم بالليل
لأن المنشطات كانت بتأثر على نومهم. بعد كده بدأت الناس تضربها وسببت
حوادث وفاة، فدخلت جدول أول سنة 2000 تقريبا. دلوقتى مصرح بيها فى بعض
الدول لعلاج مرض الخدار، ولكن شهرتها فى عالم المخدرات إنها "دواء
الاغتصاب". يعنى بمنتهى السهولة تعزم على أى حد بيها أو تديهاله على إنها
أى حاجة تانية فيمشى معاك لأى مكان، تغتصبه وتسيبه ولما يفوق غالبا مش بـ
يفتكر إيه اللى حصل.
٩- Ecstasy
اكستاسى
أو عقار النشوة، اسمه الحقيقى MDMA، مشهور جدا دلوقتى باسم الإكسات. كانت
مادة صنعها واحد فى شركة أدوية وما كانش لها لازمة ولا أى استخدام. وبعد 60
سنة جه واحد قال إنها تنفع للمرضى النفسيين، وممكن تخليهم يتحسنوا لحد ما
العلاج العادى يجيب نتيجة. لكن اللى حصل بعد كده إن كل الناس استخدمتها
وبقى اسمها الإكسات أو دوا الديسكو الأول. وبـ يتوزع أول السهرة على كل
الناس علشان تهـيـبـر وتبقى فى الموود، وترقص طول الليل من غير ما تتعب.
واتحظر بشكل مفاجئ ورسمى سنة 85 ودخل الجدول. لكن استخدامه مستمر لحد
دلوقتى فى سوق المخدرات. وبيتم انتاجه فى معامل فى دول آسيا فى صورة حبوب
ملونة مرسوم عليها فراشة أو علامة استفهام.
١٠- الهيروين
مخدر
قديم جدا وأول ما اتعمل فى شركة أدوية كان المفروض إنه بديل للمورفين بس
مش بيسبب إدمان. ونزل الأسواق لعلاج الكحة وإدمان المورفين، وكان وقتها
اختراع هـ يكسب الشركة جدا. لكن لسوء حظ الشركة إنه طلع أقوى من المورفين
بكتير فى درجة إدمانه. وأعراض انسحابه أشد بكتير. واللى بـ ياخده ما بـ
يقدرش يبطله، علشان كده اتمنع بعدها. وكل الناس اللى كانت بـ تاخده بدأت
تدخل برامج علاج. لحد دلوقتى الهيروين موجود باسم البودرة، وأردئ أنواعه
البى أس، أو البيسة باللغة الدارجة.
اللى بـ ياخده بيشمه فى البداية وبعدها لازم يدخل مرحلة الحقن أو الأنجكة. ويعتبر علاج إدمان الهيروين حاليا سهل مش صعب زى الأول.
